RAIS SAMIA AWAHIMIZA VIJANA KUIMARISHA MSHIKAMANO WA TAIFA, AONYA DHIDI YA MIGAWANYIKO

Rais wa Jamhuri ya Muungano wa Tanzania na Mwenyekiti wa Chama Cha Mapinduzi (CCM), Samia Suluhu Hassan, ametoa wito mahsusi kwa vijana nchini kurejea katika misingi ya mshikamano wa kitaifa, akionya kuwa dalili za mgawanyiko zinazoanza kujitokeza zinaweza kuhatarisha uimara wa jamii na mustakabali wa taifa.

Akizungumza katika Kongamano la Umoja wa Vijana wa Chama Cha Mapinduzi (UVCCM) lililofanyika Tunguu, Zanzibar, Rais Samia alisisitiza kuwa jukumu la kulinda, kuendeleza na kuimarisha Muungano wa Tanzania si la Serikali pekee, bali ni wajibu wa kila Mtanzania hasa vijana ambao ndio nguzo ya kizazi cha sasa na kijacho.

Alieleza kuwa licha ya mafanikio makubwa ya nchi katika kudumisha amani, utulivu na mshikamano wa kijamii, bado kuna viashiria vinavyoonyesha kulegalega kwa umoja huo, hali inayohitaji tahadhari ya haraka na hatua za makusudi kurekebisha mwelekeo.
“Nawaomba sana vijana tushikamane. Tukishikamana, adui hana nafasi ya kupita; lakini tukikubali kutenganishwa, tunampa adui njia ya kupenya,” alisisitiza Rais Samia, akionyesha umuhimu wa umoja kama ngao ya taifa dhidi ya changamoto za ndani na nje.

Katika muktadha huo, alikemea vikali matumizi ya lugha na mienendo inayochochea ubaguzi, chuki au migawanyiko miongoni mwa vijana, akionya kuwa tabia hizo zinaweza kudhoofisha misingi ya utaifa na kuhatarisha amani ambayo imejengwa kwa muda mrefu.
Aidha, aliwahimiza vijana kukuza utamaduni wa kupendana, kushirikiana na kuheshimiana, huku wakilinda kwa vitendo amani na mshikamano wa nchi kama rasilimali kuu ya maendeleo endelevu ya Tanzania.

Maoni ya Mwandishi: Ni dhahiri kwamba, kwa kuweka msisitizo kwa umoja, nidhamu ya mawasiliano na uzalendo, Rais Dkt. Samia anajenga msingi thabiti wa kuendeleza utulivu wa kisiasa na mshikamano wa kitaifa ambao ni nguzo kuu ya maendeleo jumuishi na endelevu.